Олоҕун 46 сылын устата эдэр ыччаты иитиигэ үлэлээбит Тыыл уонна педагогическай үлэ ветерана, «Учууталлар учууталлара» албан ааттаах, Ньурба оройуонун, Хорула, Өҥөлдьө нэһилиэктэрин Бочуоттаах олохтооҕо, Саха сирин интеллигенциятын I съеһин делегата, Серго Орджоникидзе аатынан стипендия хаһаайына Степанова Мария Игнатьевна аатынан Учууталлар аллеялара үөрүүлээх быһыыга- майгыга аһылынна, Мария Игнатьевна бюһа туруорулунна.
Мария Игнатьевна олоҕун устата биология, география, химия предметтарын хайа да оскуолаҕа үлэлээбитин иһин үөрэппитэ, оҕолору тулалыыр эйгэҕэ, көтөргө- сүүрэргэ, окко-маска ураты сыһыаҥҥа иитэрэ- үөрэтэрэ. 1950- 1980 сылларга нэһилиэк олохтоохторугар оҕуруот аһын арааһын үүннэрэргэ холобур буолан, үлэлээбит оскуолаларыгар пришкольнай участок булан, үүнээйини көрөргө- истэргэ, үүннэрэргэ үөрэтэрэ. Тыыннаах муннуктарга дьиэ кыылын, куһу- хааһы, кролигы иитиэххэ сөбүн дакаастыыра.
Нэһилиэк олохтоохторун убаастабылын ылан, олохтоох Сэбиэт солбуллубат депутата, дьахтар кэмитиэтин бэрэссэдээтэлэ, норуодунай суут сэтээтэлэ дуоһунаска тиксэн, дьонун- сэргэтин өрүү такайа, сүбэлии- амалыы, үөрэтэ сылдьара.
Мария Игнатьевна өлбөт сүппэт аатын үйэтитэргэ оскуола коллектива өйөөн, кыыһа Людмила Михайловна Павлова, педагогическай үлэ ветерана, РФ үөрэҕириитин туйгуна, «Учууталлар учууталлара», бу оскуола урукку директора уонна оскуола директора, М. И. Степанова сиэнэ, СӨ үөрэҕириитин туйгуна Андрей Николаевич Павлов бу оскуола 1991 сыллааҕы выпускнига Москватааҕы кинематография институтун аниматор выпускнига, ИП, норуот талааннааҕа, билигин Нам улууһугар олорор Григорий Егорович Максимовка бюст сакаастаан оҥорторбуттара. Григорий Егорович бэйэтэ кэлэн, постаменын оҥорон, бар дьонун болҕомтотугар, көрүүтүгэр- истиитигэр таһаардылар. Г. Е. Максимов Россия, Саха сирэ уонна атын араас дойдуларга муустан, муостан, мастан, араас састааптаах буортан оҥорор, айар, тутар дэгиттэр талааннаах скульптор- худуоһунньук, Өҥөлдьө бастыҥ ыччата.
Бу дьоро киэһэ Улуус дьаһалтатын баһылыга А. М. Иннокентьев уонна улуус араас тэрилтэлэрин салайааччылара күндү ыалдьыт буолан, оскуола учууталларын, үөрэнээччилэрин, олохтоохторун үөрүүлэрин үллэһилиннилэр. Учууталлар уонна үөрэнээччилэр Учууталларын Мария Игнатьевна Степанова үөрэҕэ, үлэтэ, ситиһиитэ, баҕа санаата олоххо киирбитин туоһулаан, өссө да үрдүк кирбиилэри, ситиһиилэргэ толору бэлэмнэрин көрдөрөн, тэрийбит, ыыппыт үлэлэрин киэҥ эйгэҕэ таһаарарга үлэлии- хамсыы сылдьаллар.