Ахсынньы 7 күнүгэр Өҥөлдьө нэһилиэгэр сарсыардаттан кэлии-барыы, киирии-тахсыы үксээтэ. Бу күн нэһилиэк орто оскуолата 90 сааһын, бу оскуолаҕа 41 сыл устата директордаабыт Аҕа дойду сэриитин бэтэрээнэ, Саха Өрөспүүбүлүкэтин Үтүөлээх учуутала , «Кыһыл Сулус» орден кавалера Дмитрий Иванович Павлов 95 сааһын өрөгөйдөөхтүк бэлиэтииргэ бэлэмнэммиппит ыраатта.
Сарсыарда оскуола айаҕар араас мааркалаах массыына тоҕуоруспутунан көрдөххө, элбэх киһи, ыалдьыт кэлбит. Бүгүҥҥү күҥҥэ бырагыраама быһыытынан «Павловскай ааҕыылар» НПК, «Выпускниктар быыстапкалара», «Көлүөнэлэр көрсүһүүлэрэ», «Махталынан байыта алгыыбын» кинигэ презентацията о.д.а. тэрээһиннэр учууталлары, үөрэнээччилэри, ыалдьыттары күүтэр.
Дмитрий Иванович Павлов баай олоҕун историятын билбэт олохтоох, үөрэнээччи суоҕун тэҥэ. Бүгүҥҥү да ыалдьыттар Д.И. Павлов аатын ааттаан кэлбит буолуохтаахтар. Онон бу суруйуу НПК туһунан буолуоҕа.
«Киһи олорорун тухары үөрэнэр» диэн кынаттаах бэргэн тыл этиллибит эрэ буолбатах. Бу олоххо баар суол – киһи туох эмэ саҥаны чопчулаатаҕына, түмүгүн таһаардаҕына, онтун хайаан да бар дьонун дьүүлүгэр таһаарар, үллэстэр, сыаналатар буоллаҕа. Ол сиэринэн сыл устата хас эмэ араас НПКлар буолаллар, онно учуутал, иитээччи, үөрэнэччи туох эмэ саҥаны, сонуну, толкуйу тэнитэн, чопчулаан таһаарар. Биһиги Учууталбыт Дмитрий Иванович үлэлииин тухары ааҕар, сайдар туһугар төһө эмэ үлэлээтэҕэ, билбэтин билэ сатаан ааҕара, сурунара, көрбөтөҕүн-истибэтэҕин сонурҕаан ыйыталаһара-туоһулаһара. Куруук тугу эрэ бэлиэтэнэ-суруна сылдьар буолара. Маны барытын туһанан НПКбытын «Павловскай ааҕыылар» диэн ааттаан, эрдэттэн балаһыанньатын бигэргэттэрэн, тарҕатан, оройуон оскуолаларыттан, уһуйааннартан кыттааччылары күүппүппүт.
«Павловскай ааҕыылар» НПКҕа оройуон 11 оскуолатыттан барыта 60 үөрэнээччи кыттыыны ылла. Ол быыһыгар Бүлүү оройуонун Халбаакы орто оскуолатын 7 үөрэнээччитэ кытыннылар. Учууталларга уонна уһуйааччыларга 47 киһи 17 оскуолаттан, ону таһынан Сунтаар оройуонуттан 2 учуутал үлэтэ кэтэхтэн кыттыыны ыллылар. Бу ааҕыыбыт 4 араас хайысхалаах : «Семья – главный институт воспитания», «Воспитательные аспекты педагогической деятельности», «Методическая копилка», «Я – исследователь» – үлэлээтэ, 1 – 4 кылаастарга – 11 үөрэнээччи 3 оскуолаттан, 5-6 кылаастарга – 21 үөрэнээччи 9 оскуолаттан, 7 – 11кылаастарга 28 үөрэнээччи 7 оскуолаттан кытыннылар. Араас таһымнаах үлэлэри дьүүллүүр сүбэ болҕойон иһиттэ, түмүгүн таһаарда, сүбэ-ама биэрдэ, салгыы сайыннарарга, кыттарга алҕаата. Ол курдук түмүк таһаарыытыгар тиийэн бары да үөрүү-көтүү буоллубут, кыайыылаахтар ааттаннылар: Филиппова Ярослава (Өҥөлдьө) Лауреат үрдүк аатын, Федорова Мия (Чуукаар) 1 миэстэни, Семенова Марина (Өҥөлдьө) 2 миэстэни, Андреева Анна (Өҥөлдьө) 3 миэстэни 1–4 кылаастар үөрэнээччилэрин ортолоругар; Николаев Вася (Дьаархан) Лауреат үрдүк аатын, Васильева Марина, Колесова Нарыйа (Хаҥалас) 1 миэстэни, Александров Костя (НТЛ) 2 миэстэни, Яковлева Хелена (Сүлэ) 3 миэстэни 5–6 кылаастар үөрэнээччилэрин ортолоругар; Давыдова Нарыйа (Хорула) Лауреат үрдүк аатын, Николаев Аман (Ньурбачаан) 1 миэстэни, Ушаков Саша (Өҥөлдьө) 2 миэстэни, Терентьев Вася (Халбаакы) 3 миэстэни 5–6 кылаастар үөрэнээччилэрин ортолоругар. Үөрэнээччилэр анал тиэмэлэрин таба тайанан, ырыппыт, толкуйун булбут үлэлэрин биир саастаахтарыгар чуо-бааччы кэпсээн сэргэхситтилэр.
«Семья – главный институт воспитания» сиэксийэҕэ Харлампьева М.Н. (1№-дээх НОО) Гран-При, Бочкарева А.С. (Хаҥалас) 1 миэстэни, Кононова В.Д. (Хорула) 2 миэстэни, Емельянова Т.А., Николаева В. М., Егорова О.А., Сухаринова Э.В. (Сүлэ) 3 миэстэни; «Методическая копилка» сиэксийэҕэ Кондратьева А.Н. (Киров) Гран-При, Анисимова М.Ф. (Чуукаар) 1 миэстэни, Ощепкова Л.П. (Антоновка) 2 миэстэни, Григорьев В.Р. (Дьаархан) 3 миэстэни; «Воспитательные аспекты педагогической деятельности» сиэксийэҕэ Давыдова В.Я. (ЦДНТТ) Гран-При, Степанова А.С. (Өҥөлдьө) 1 миэстэни, Данилова А.А. (Марха) 2 миэстэни, Корнилов А.М. (Өҥөлдьө) 3 миэстэни ылан, үлэлэрин түмүгүн таһааран кыайыы өрөгөйүн биллилэр. Бу сөҕүмэр элбэх үлэни үрдүк таһымнаах компетентнай дьүүллүүр сүбэ сыаналаан, сөптөөх түмүгү таһаарда.
Ханнык баҕарар үлэ сыаналанар буоллаҕына түмүктээх буолар, ол курдук бу күн Людмила Михайловна Павлова үөрэнээччилэрэ бэйэлэрэ кылаастарын салайааччытын, педагогическай үлэ бэтэрээнин, Учууталлар учууталларын туһунан истиҥ-иһирэх тыллаах ахтыы кинигэни күн сирин көрдөрөн бэлэх ууннулар. Учууталлара үөрүөн үөрэр, үлэтин түмүгэ кинигэ буолан таҕыстаҕа дии. Бу курдук сыаналыыллар эбит кинини, күндү учууталларын. Маалыкайтан, Хорулаттан делегациянан кэлэн эҕэрдэлээн, үөрдэн-көтүтэн бараллара, учууталга эрэ буолбакка, бүтүн нэһилиэккэ үөрүүлээх.
Өҥөлдьө орто оскуолата 2004 сыллаахтан Дмитрий Иванович Павлов аатын дьоһуннук сүгэр. Ытык киһи төрөөбүт-үөскээбит, үөрэммит оскуолатын үлэтинэн оройуон киэн туттуон туттар. Барыга инники буоларга дьулуһабыт, үөрэнэбит. Бу өрөгөйдөөх күммүтүгэр да оройуон үгүс оскуолата кыттан барбыта ону туоһулуур.