Бу тэттик ыстатыйабытыгар М.В. Мегежекскэй аатынан Маалыкай орто оскуолатын 9 кылааһын туйгун үөрэнээччитэ, сыл түмүгүнэн “Лучший исследователь” аат хаһаайката Бурцева Сайаана туһунан сырдатыахпыт.
Сайаана 2011 сыл көмүс күһүнүгэр хобо чуораан лыҥкынас тыаһа доҕуһуоллаах Маалыкай орто оскуолатын боруогун атыллаан, маҥнайгы кылааска киирбитэ. Онтон ыла киниэхэ саҥа олох, сонун интэриэстэр, умсугутуулаах дьарыктар, таайыллыбатах арыйыылар, кэккэ ситиһиилэр саҕаланан барбыттара.
Маҥнайгы учуутала Изабелла Петровна Попова, оһуор үҥкүүтүн ойуулуур, харах таптыыр хартыыналарын тыынныыр тарбаҕар талааннаах, тула өттүттэн кэрэ киһи, Сайаананы кырачаан илиититтэн сиэтэн, билии-көрүү суолугар бигэтик туруорбута.
Лоп бааччы саҥарар, ааҕар буолбут Сайаана маҥнайгы чинчийэр үлэтин 2 кылааска үөрэнэ сылдьан, П.Н. Тобуруокап хоһооннорунан «Эҥин да араас оҕолор…» диэн тиэмэлээн оройуоннааҕы «Маҥнайгы хардыы» НПК –ҕа Бурцева Е.В. салалтатынан кыттыбыта, 3 бириистээх миэстэҕэ тиксибитэ. Поэт оҕолорго аналлаах 40 хоһоонун ааҕан, геройдарын майгыларын-сигилилэрин кэтээн, аттыгар үмүөрүһэр, бииргэ оонньуур-үөрэнэр аймах-билэ оҕолоругар, доҕотторугар дьүөрэлээн чинчийии оҕотун оҥорбута.
6 кылааска үөрэнэ сылдьан, математика учуутала, кылааһын салайааччыта Семянова С.В. «Мой Малыкай — в задачах» үлэлэринэн оройуоннааҕы «Открой в себе ученого» НПК-ҕа кытыннарбыта. Дакылаакка төрөөбүт нэһилиэкпит чахчыларыгар олоҕуран, математика уруогар туһанарга аналлаах садаача арааһын толкуйдаан, суот-учуот оҥорбуттарын тиспиттэрэ.
Бу сыл сайыныгар биология учуутала Иванова С.С. көҕүлээһининэн, арыаллааһынынан Сайаана Алтай Республикатыгар Россия үөрэнээччилэрин экологическай экспедицияларыгар киирэн, үгүс чинчийэр үлэҕэ кыттыһан, элбэҕи билэн-көрөн кэлбитэ. Сири-буору, радиация дьайыытын, минеральнай хаһаастар химическэй састааптарын, ас-үөл химическэй анаалыһын уо.д.а. кэтээн, чинчийэн, мониториннаан, ырытар үлэҕэ сонун билиилээх, таарыйа сынньанан, элбэх оҕону кытта билсэн, доҕордоһон үөрэн-көтөн кэлбитэ.
2018 сыл омук тылын учуутала Афанасьева Н.А. салайааччылаах оройуоннааҕы «Инникигэ хардыы» НПК-ҕа «Этнокультурные особенности зооморфизмов в английском и якутском языках» дакылаатынан региональнай түһүмэххэ рекомендацияламмыта. Онно тиийэн 2 истиэпэннээх Диплому илиитигэр тутан үөрүүтэ өссө үрдүүр. Салгыы Дьокуускай куоракка республикатааҕы «Инникигэ хардыы» НПК-ҕа кыттар. Ол сырыытыттан истээччилэр, дьүүллүүр сүбэ чилиэттэрин ыйытыктарыгар хоруйдуур, иһитиннэрииҥ, үлэҥ туһунан санааларын истэр олус долгутуулаах этэ диэн ахтар. Эһиил эмиэ хайаан да кыттыам, олус интэриэһинэй эбит диэн хараҕа уоттанан, сырыытыттан астынан кэлбитэ.
2019 сыл муус устарыгар республикатааҕы «Состояние и перспективы развития бокса в Нюрбинском районе» НПК-ҕа Бурцева Е.В. салайааччылаах «Травмы в боксе и их профилактика» дакылаатынан 3 миэстэҕэ тиксибитэ, дьүүллүүр сүбэ биһирэбилин ылбыта, хайҕал тылларын истибитэ.
Бу сыл Афанасьева Н.А. салайааччылаах оройуоннааҕы «Инникигэ хардыы» НПК-ҕа Лауреат үрдүк аатын ылан, салгыы региональнай НПК-ҕа кыттыбыта. Үлэтин тиэмэтэ «Оценочность семантики фразеологизмов наименования лица в английском и якутском языках». Бу дакылаатынан 1 истиэпэннээх Диплом хаһаайката буолбута. Республикатааҕы В.П. Ларионов аатынан «Инникигэ хардыы» НПК-ҕа эмиэ 1 истиэпэннээх Диплом кыайыылааҕа аатын сүкпүтэ. Былырыын туруоруммут соругун ситэн, олус үөрбүтэ, санаата көтөҕүллүбүтэ.
Кыайыы-хотуу, үрдүк ситиһии өрөгөйүн дьүүллүүр сүбэ салгыы Казань куоракка Н.И. Лобачевскай аатынан Всероссийскай НПК-ҕа кыттарга бэлиэ сурук туттарбыта өссө үрдэппитэ, саҥа сонун саҕахтары эрэннэрбитэ. Ону дойду үрдүнэн дьаҥ сатыылаан, кэлии-барыы бобуллан, ылыллыбыт билиэт төннөрүллэн, Казань куоракка аан сабыллыбта. Тэрийэр хамыыһыйа быһаарыытынан, үлэтин видеонан көмүскээн ыыппыта. Ол түмүгэр, электроннай почтаҕа тирилээн кэлбит 1 истиэпэннээх Диплом өрөгөйдөөх түгэн туоһута буолбута.
Оҕо ыраастык саҥара, бэйэтин ис санаатын дьоҥҥо тиэрдэ, киэҥ эйгэҕэ холкутук саҥара үөрэнэрэ кыра кылаастан уhуйулларын Сайаана бэйэтинэн билэр. Бу ситиһиилэрэ элбэх киһи куолаан кыһамньытын, түбүгүн түмүгэ буоларын өйдүүр, ол иһин учууталларыгар истиҥник махтана саныыр.
Үөрэтэр-чинчийэр үлэ үөрүйэхтэрин ылыылара билиҥҥи үйэҕэ бэйэтин санаатын туруулаhар, араас омук дьонун кытта тэҥҥэ алтыhар, патриот санаалаах ыччат иитиллэн тахсарыгар олук буолар диэн бары билэбит. Сайаанаҕа инникитигэр өссө үрдүк ситиһиилэр сэтиилэнэн кэлэ туралларыгар баҕарабыт, үөрэнэр-үлэлиир оскуолабытыгар оҕо төгүрүччү сайдар усулуобуйатыгар сөптөөх болҕомтону ууралларыгар махтанабыт.
Кылаас салайааччыта Семянова С. В.
Ыам ыйын 22 күнэ, 2020 сыл.