Казаньҥа, Москваҕа сырыы түмүгүнэн санаа атастаһыытыгар, бэйэ үлэтин сыаналааһыҥҥа, инникигэ көрүүлэргэ бэрт сэргэх кэпсэтии буолан ааста.
Ол курдук иккис сылын салайааччынан үлэлиир Дария Семеновна Абрамова стажировкаттан элбэҕи билбитин-көрбүтүн, Майя Олеговна Николаева куһаҕаннык саҥарар оҕо ахсаана элбээн иһэринэн логопед штата толору көрүллэрэ буоллар диэн санааларын үллэһиннилэр. Оттон Егор Кириллович Егоров доруобуйаларынан хааччахтаах оҕолору кытта үлэҕэ сыһыаннаах боппуруостары ордук сэҥээрбитин уонна бу хайысхаҕа музыка киэҥник туһанылларын көрөн-истэн бэйэтин уһуйааныгар киллэриэххэ сөбүн эттэ.
Үгүспүт даҕаны, биһиги оҕо саадтарбыт киин сиртэн хаалсыбакка, сорох көрүҥнэргэ таһыччы да иһэрбитин бэлиэтии көрбүппүтүн бэлиэтээтибит.
Холобур, робототехникаҕа, легоконструированияҕа быйылгы өрөспүубүлүкээнискэй чемпионат түмүгүнэн Бүтүн Россиятааҕы түһүмэххэ 6 хамаанда тахсыбытыттан үһэ биһиги оройуоммут хамаандалара буолалларынан киэн тутта санаатыбыт.
Оройуон үөрэхтээһиҥҥэ салалтатын начальнига Алевтина Петровна Аргунова оскуолаҕа киириэн иннинээҕи саастаах оҕолору тэрилтэтэн хабыыга өссө да 186 оҕо уочаракка турарын, онон саҥа оҕо саадтарын тутуу, кэҥэтии боппуруоһа бүгүн да тирээн турар сорук буоларын эттэ. Бу салааҕа кылаабынай специалист Елена Мартыновна Котоконова уһуйааннарга киирэр саҥа сүүрээннэри билиһиннэрдэ, инники өттүгэр ДЮСШ-ны кытта дуогабар быһыытынан чэбдигирдэр-сайыннарар спортивнай эбии үөрэхтээһин хайысхатынан үлэ ыытарга санаатын үллэһиннэ.
Оройуон баһылыгын социальнай боппуруостарга солбуйааччы делегациябытын кытта Москваҕа быһаччы үлэлэспит Анна Михайловна Уларова Государственнай Дума VII ыҥырыылаах Федеральнай Мунньаҕын депутатын, «Биир ньыгыл Россия» фракциятын бүддьүөт уонна нолуок кэмитиэтин чилиэнэ Г.И.Данчиковалыын көрсүһүүгэ сөптөөх боппуруостар туруоруллубуттарын бэлиэтээтэ.
Түмүккэ Алексей Михайлович оҕо киһи быһыытынан ситэн-хотон, үүнэн-сайдан тахсыытыгар олук уурар сааһынан уһуйаан сааһа буоларын бэлиэтээн, биһиги үлэбитин өйүүрүн, оройуон кыаҕынан оҕо саадтара тутуллалларын, материальнай-техническэй базаны кэҥэтиигэ сөптөөх үп көрүллэрин, үөрэх эйгэтин үлэһиттэринэн хааччыйыыга, дьиэ кэргэни өйөөһүҥҥэ сөптөөх үлэ ыытылларын бэлиэтээтэ.
Көрсүһүү олус истиҥ бэйэ бэйэҕэ махтал тылларынан түмүктэннэ.
Венера Степанова, Кундээдэтээҕи «Кэнчээри» оҕо саадын сэбиэдиссэйэ.