Муус устар ый 18 күнүттэн 23 күнүгэр диэри билиҥҥи кэмҥэ сүрдээх тоҕоостоох ис хоһоонноох күрэҕи Томпо улууһун Кириэс Халдьаайы оскуолата тэрийэн ыытта. «Юный мастер животновод -2022» диэн ааттаан, практическай уонна тылынан тургутуктаан, киһи сэҥээрэр тэрээһинин балаһыанньатын тарҕаппыттар. Республика таһымнаах күрэххэ 12 улуустан (Чурапчы, Уус-Алдан, Мэҥэ-Хаҥалас, Сунтаар уо.д.а.) барыта 19 агрооскуола үөрэнээччилэрэ күөн көрүстүлэр.
Биһиги, М.В. Мегежекскэй аатынан Маалыкайбыт оскуолатыттан 10 «б» кылаас үөрэнээччилэрэ: Степанова Долгуна, Васильев Василий, Никифоров Сергей – тута үөрэ-көтө сөбүлэһэн, бэлэмнэнэн, ситиһиилээхтик кытыннылар. Кыттааччылар 20 мүнүүтэлээх киинэҕэ бэйэлэрин сатабылларын арылыччы көрдөрүөхтээхтэр. Ол курдук, хаһаайыстыба туһунан билиһиннэрии, ынах туһунан сиһилии кэпсээһин, ынах чаастарын ааттаталааһын, сүөһү тыыннаах ыйааһынын быһаарыы, аппаратынан ынаҕы ыаһын, илиинэн ыаһын хаамыытын көрдөрдүлэр. Тиһэҕэр, тургутукыйытыыларыгар хоруйдаатылар.
Оҕолорбут бу күрэххэ чааһынай хаһаайыстыба, оскуолабыт уонна «Сайдыы» ТХПК үлэтин ис хоһоонун билиһиннэрдилэр. Биирдии ынаҕы анал талан ылан, майгытын-сигилитин, боруодатын, конституциятын имэрийэ-томоруйа сиһилии кэпсээтилэр. Сүөһү тыыннаах ыйааһынын быһаарыыга үс атын-атын ньыманы туһаннылар. Илиинэн, аппаратынан ыырга сүрдээх сыстаҕастарын көрдөрдүлэр.
Тэрийээччилэр үгүс кыттааччы түмсүбүтүттэн үөрүүлэрэ муҥура суох. Саамай сөхпүттэрэ – уолаттар элбэхтэрэ. Тыабыт сирэ эрэллээх илиигэ баар эбит диэн бары даҕаны санаабыт чэпчээтэ.
Дьүүллүүр сүбэ түмүгүнэн, Чурапчы оройуонун И.Е. Федосеев –Доосо аатынан Дириҥ агрооскуолатын 10 кылааһын үөрэнээччитэ Федосеева Владилена кыайыылааҕынан биллэрилиннэ. Биһиги Долгунабыт бочуоттаах 3-с миэстэҕэ тиксэн, үөрүүбүт үрдээтэ.
Оҕолорбут, ыччаттарбыт тыа сириттэн, сүөһү иитиититтэн тэйэ иликтэр эбит диэн, кыстык, сайылык тыына оҕолорбутугар билигин даҕаны баар эбит диэн хас биирдии кыттааччы оҕо, салайааччы – бары бу тэрээһинтэн дуоһуйууну, астыныыны эрэ ыллыбыт.
Бурцева Елена Васильевна,
М.В. Мегежекскэй аатынан Маалыкай орто оскуолатын
саха тылын, литературатын учуутала,
күрэх кыттааччыларын салайааччыта
26.04.2022