Ньурбатааҕы Эбии Үөрэхтээһин киинигэр “Мин Айыы сирин оҕотобун” бырайыак салгыы бара турар. Санатан этэр буоллахха бу иннинэ “Кыһыҥҥы айылҕалыын алтыһыы”, “Аал уоту аһатыы сиэрэ-туома”, “Байанай ыйа”, “Харысхаллар суолталара” уонна тохсунньу 18 күнүгэр “Танха дьиктилэрэ” диэн тэрээһин оҕолорго буолан ааста. Бырайыак сыала-соруга саҥа үйэ оҕолоругар сиэри-туому кэпсээһин, сахалыы угэстэри тутуһуу, сахалыы куту-сүрү иҥэрии , төрөөбут дойдуну таптааһын, тулалыыр эйгэни харыстааһын буолар.
Бу сырыыга Антоновка оскуолатын 8 “б” кылааһын оҕолоро учууталларын Санникова С.О уонна төрөппүт Пахомова Л.И кытта , Ньурба №3 оскуолатын уонна ЦДОД иитиллээччилэрэ сырыттылар. Тэрээһин “Олонхо дьиэтигэр” үгэс курдук ыытылынна. Оҕолор сахалар уһун киэһэлэргэ күүстээх үлэ кэнниттэн билгэлэнэллэрин, Танха суолтатын, ыытыллар быраабылаларын Ньурба куоратын “Сардаҥа” эбээлэр түмсүү актыыбынай чилиэннэрэ Крылова Л.Н, Саввинова Д.А, Саввинова Р.М, Николаева Е.Н, Антонова М.В, Егорова В.И, Петрова А.Н бэрт итэҕэтиилээхтик кэпсээтилэр. Н.Якутскай “Төлкэ” кинигэтиттэн быһа тардан сценка онорон көрдөрдүлэр таарыччы ити кинигэни булан ааҕалларыгар сүбэлээтилэр. Оҕолорго танханан наһаа үлүһүйбэттэригэр туох барыта быраабылалааҕын билиһиннэрдилэр. Баҕалаахтар түөрэх быраҕан көрдулэр, таһыгыраччы умайа турар көмүлүөк оһох сылааһыгар эбээлэр астаабыт минньигэс алаадьыларын үөрэ-көтө сиэн, боппуруос бөҕө биэрэн астыннылар. Эбээлэр хас биирдии оҕоҕо, ыалдьыкка саҥа кэлбит сылга үтүэ тыллардаах баҕа санаалара суруллубут Алгыстаах Сурук биэрдилэр. Хас биирдии оҕо ол туоларыгар бүк эрэнэн уөрэн-көтөн, элбэҕи билэн-көрөн өссө да маннык тэрээһиннэргэ кэлиэх буоллулар.
Саха буоларгынан киэн тутун эн, Айыы сирин оҕото!
Эбии үөрэхтээһин киинин музейнай үлэҕэ методиһа Давыдова В.Я