Бу кулун тутар ый ортотугар биһиги телестудиябыт быйыл саҥа устубут киинэлэрбит сүрэхтэниилэрин тэрийэн ыытта. Ол курдук, бастакы киинэбит “Дьулуур уонна кини хамаандата” диэн оҕо хамсааһынын үлэтин сырдатар киинэ, онтон «Таптал киһини бэйэтэ булар» диэн иккис киинэбитигэр биһиги саастыы оҕолор истиҥ сыһыаннарын көстөр.
Тэрээһин сайыҥҥы киинэбит уһуллубут сиригэр Сүлэ орто оскуолатыгар ыытылынна. Бу күн биһиги киинэ нөҥүө саҥа булуммут доҕотторбут Ньурбачаантан, Күндээдэттэн , Малдьаҕартан, Маартан, Сүлэттэн уонна “Калейдоскоп” оҕо телестудиятын оҕолоро,улахан дьон мустубуппут.
Маҥнай тиийдэ тиийээт тэрийээччилэр буоларбыт быһыытынан билсиһии оонньуулары ыыппыппыт.Оҕолор бары үчүгэйдик билсиспиттэрин кэннэ этэрээттэргэ араартаан, “эдэр ыччат, чөл олох” тиэмэлэригэр көрүдьүөс вайннары уһултара ыыталаабыппыт. Дьэ, ол кэннэ бары күүппүт тэрээһиммит сүрүн чааһа киинэлэрбитин көрөөһүн саҕаламмыта. Оҕолор да, улахан да дьоннор икки чаас устата биир тыынынан киинэлэрин көрөн олус астыннылар. Мантан биһиги, киинэни уһулбут-оҥорбут дьон быһыытынан үлэбит үрдүк сыанабылы ылла диэн эрэннибит.
Бу кэннэ, толору астаах бырааһынньык минньигэс остуолугар бары ыҥырылыннылар.Остуол тула үөрэ-көтө аһыы-аһыы, кэлбит ыалдьыттар бэйэлэрин кэһиилэрин, эҕэрдэ нүөмэрдэрин бэлэхтээтилэр .
Кэнсиэри Антоновкаттан, кырачаан артыыстарбыт Борисов Витя хоһоонунан уонна Антонов Дьулус олоҥхоттон быһа тардан ааҕыытынан саҕалаатылар.Салҕыы Ньурбачаантан кэрэ куоластаах Константинова Майя уонна рэпер Куприянов Георгий дуэтынан олус табыллыбыт ырыаларын бары кэрэхсии иһиттибит. Өссө биир чаҕылхай нүөмэри бэлэхтээтэ Маартан Неустроев Фадей. Кини аныгы үҥкүүнү имигэстик үҥкүүлээн сөхтөрдө. Бу кэннэ учууталбыт Элена Евгеньевна барыбытыгар соһуччу бэлэх уунна. Ол буолар, Маар онус кылааһын үөрэнээччитэ, иллюзионист Павлов Дьулустаан фокустарын көрдөрүүтэ. Кини ыҥырыллыбытын биһиги студия оҕолоро эрэ билэр этибит. Кини былырыын биһиэхэ ыалдьыттаан турардаах. Ол күн Дьулустан фокустарын көрдөрөн биһиги сөҕүөхпүтүн сөхпүппүт. Бу туһунан “Күнчээн” биэриитигэр сюжет оҥорон уонна “Кэскил” хаһыакка интервью ылбыппытын сырдаппыппыт. Онтон быйыл, бу соторутааҕыта уолбут, биһиги геройбут республикатааҕы иллюзионистар күрэхтэригэр 1 миэстэни ылбытын бары астына истибиппит. Эрэллээх табаарыспыт ыҥырыыбытын ылынан, бу тэрээһиммитигэр кэлэн олох буруолуу сылдьар саҥа фокустарын көрдөрөн дьон биһирэбилин ылбыта. Ол курдук, кырачаан оҕолорбут отой иннигэр сүүрэн тиийэн, саба түһэ сытан харахтара кэҥиэр дылы хас биирдии хамсаныытын кэтээн көрбүттэрэ, телефоннарыгар уһулбуттара.
Эҕэрдэ концерт кэннэ эмискэ уоту араарбыттара уонна арай көрбүппүт аан диэкиттэн чүмэчи уота көһүннэ. Музыка тыаһаата, ону кытары биһиги оскуоланы бүтэрэр доҕотторбут бырааһынньыктааҕы чүмэчилэрдээх туорду остуолга үтэн киллэрдилэр. Оҕолор бары ытыстара хабыллыар дылы таһыннылар. Ол кэннэ кинилэр барыбытыгар туортан быһан күндүлээбиттэрэ..
Киинэҕэ уһуллубут, быйыл оскуолаларын бүтэрэр сүрүн геройдарбытыгар тыл бэриллибитэ. Малдьаҕартан Дьулустаан Кононов оҕолорго бу курдук эппитэ: “Эһиги, оҕолор киинэҕэ элбэхтик уһуллуҥ. Мин курдук, “Калейдоскоп” оҕо телестудиятын кытары ыкса алтыһыҥ-доҕордоһуҥ. Кинилэр баар буолан мин сайын аайы киинэ лааҕырдарыгар сылдьыбытым уонна икки киинэҕэ оонньообутум, олус элбэх умнуллубат күннэри бииргэ атаардыбыт”. Онтон Күндээдэттэн Саша Мийхайлов маннык эттэ: “ Киинэҕэ уһуллар олус туһалаах. Киинэ киһини сайыннарар онон киинэни таптааҥ, элбэхтэ уһуллуҥ”.
Киинэлэр түмүктэринэн оҕолор, улахан дьоннор улуустааҕы дьаһалта баһылыгын солбуйааччытыттан Васильев И.А., Ньурба куорат баһылыгыттан Иннокентьев А.М., НВК “Саха” Ньурбатааҕы филиалын салайааччытыттан Кириллина В.И. уонна Ньурбатааҕы оҕону эбии үөрэхтээһин киинин директорыттан Улинова А.Ф махтал суруктары, сэмэй бэлэхтэри тутан олус үөрдүлэр.
Тэрээһини уоттаах-күөстээх дискотека түмүктээбитэ.
Түгэнинэн туһанан улахан махталбытын тириэрдэбит тэрээһиҥҥэ көмөлөспүт С.С.Сюльскай аатынан Сүлэ орто оскуолатын дириэктэригэр Семенов Н.Н., дириэктэри иитэр үлэҕэ солбуйааччыга Федоров Д.А. уонна бүтүн оскуола коллективыгар.
Аланнырова Эсланда – 9 кылаас, “Калейдоскоп” оҕо телестудиятын иитиллээччитэ, Ньурба к.