Ситиһиилээх дьон туһунан кэпсиибит. “ Ыал-үтүө үгэс ситимэ“ быыстапка
Аан дойду үрдүнэн бэлиэтэнэр Дьиэ-кэргэн күнүн чэрчитинэн Эбии үөрэхтээһин киинэ “ Ыал-үтүө үгэс ситимэ“ диэн ааттаах быыстапканы дьиэ кэргэҥҥэ аналлаах декада чэрчитинэн ыытта.
Ханнык баҕарар дьиэ-кэргэн бэйэтэ үтүө үгэстэрдээх, холобур буолар духовнай сыаннастардаах буолар. Толору дьиэ кэргэҥҥэ иитиллибит оҕо, олоххо бөҕө тирэхтээх ситиһиилээх буола улаатар. Онон бу быыстапка сыала- соруга ситиһиилээх ыаллар тустарынан кэпсиир.
Ситиһиилээх киһи диэн кимий? Киһи олоҕор ситиһии оруола туохханый? Дьэ маннык ыйытыыларга аан бастакынан үтүө сүбэһит буолар эбит төрөппүт кэнниттэн Учуутал. Оччоттон баччаҕа диэри ыччаты иитиигэ сүрүн оруолу Учуутал ылар. Учуутал оҕоҕо билиини биэрэрин таһынан киһиэхэ киһилии сыһыаны, истиҥ иэйиини уһугуннарар, кэрэҕэ сырдыкка сирдиир оҕону сөптөөх суолга киллэрэр, үөрэтэр-такайар киһи. Киһи олоҕор олус улахан суолтаны профессияны сөпкэ талыы ылар эбит. Өскөтүн үлэҕинэн дуоһуйар үөрэ-көтө барар буоллаххына тугуҥ барыта табыллар, стресскэ ылларбаккын, ситиһиилээх буолаҕын.
Ыытыллыбыт быыстапка ананна РСФСР уонна Саха АССР оскуолатын үтүэлээх учуутала, сэрии уонна үлэ бэтэрээнэ Петр Софронович Егоров уонна кини кэргэнэ Герой ийэ Иванова Анна Андреевна дьиэ кэргэттэригэр. Кинилэр Саха өрөспүүбүлүкэтин Өйдөбүнньүгүн кинигэтигэр соторутааҕыта киирбит «Лучшая трудовая династия» номинация хаһаайыннара буоллулар. “Дьөгүөрэптэр педагогическай династиялара“ саҕаламмыт эбит гражданскай сэрии кыттыылааҕа, оройуон бастакы учууталларыттан биирдэстэрэ Иванов Андрей Саввичтан. Династияҕа 4 көлүөнэ киирэр, уопсай педстажтара 2011сыллааҕы көрдөрүүнэн — 1022 сыл. Көлүөнэттэн көлүөнэҕэ Учуутал үрдүк аатын туппут Дьөгүөрэптэр династияларын кэпсиир быыстапкаҕа куорат оскуолатын, Ньурбачаан оскуолатын үөрэнээччилэрэ сырыттылар. «Ньурба эрэлэ” оҕо түмсүүтун оҕолоро Егоров П.С “Киһи тоҕо олороруй?” диэн олох, ыччат туһунан санааларын суруйбут суругуттан быһа тардан аахтылар.
Династия маҥнайгы саҕалааччыта Иванов Андрей Саввич кыыһа №2 оскуола географиятын учуутала Саха республикатын үөрэҕириитин туйгуна Капустина Мария Андреевна, Петр Софронович Егоров кыыһа партийнай-муниципальнай сулууспа бэтэрээнэ, Ньурбатааҕы оҕо спордун оскуолатын педагог-тэрийээччитэ Егорова Клавдия Петровна дьоннорун туһунан слайданан көрдөрөн ахтыы оҥордулар.
Мустубут дьон Саха өрөспүүбүлүкэтин Ил Дарханын Е.А.Борисов «Лучшая трудовая династия» номинация бэлиэтин туттарбытын видеонан, Улуус дьаһалтатын Дьиэ кэргэҥҥэ отделын эбээһинэһин толорооччу Васильева С.А ол бэлиэни туттарбытын киэн тутта көрдүлэр уонна бэйэлэрин эҕэрдэ тылларын анаатылар. Быыстапканы аһыы аалай кыһыл лиэнтэтин Петр Софронович оҕолоро Клавдия Петровна, Ярослав Петрович уонна Андрей Саввич кыыһа Мария Андреевна быстылар. Мустубут дьон быыстапка баай матырыйаалларын сиһилии көрдүлэр.
Маннык быыстапкалар эдэр ыччакка, оҕолорго тэриллэн ыытыллара оҕону патриотическай иитиигэ улахан туһалааҕа буолуо диэн эрэнэбит уонна кырдьаҕас учуутал, директор үтүөкэннээх киһи Егоров Петр Софронович эдэр ыччакка суруйан хаалларбыт «Кэс тылыттан” быһа тардан “….Сахаларга үс өргөстөөх үтүө киһи туһунан уос номоҕо баар . Ол олоххо дьоҕурдаах, ылбычча аайы өлөн-охтон биэрбэт, сытыы-хотуу үчүгэй киһини этэллэр. Үтүө киһи элбэх араас идэлээх, эргиччи билиилээх буолуохтаах. Бүгүҥҥү киһи олохпут эдэр ыччат дэгиттэр идэлээх буолуутун чорботон ирдиир. Ол иһин үүнэн иһэр көлүөнэ кырдьаҕас көлүөнэттэн эстафетаны тутан общество достойнай тутааччыта буолар туһугар эрдэттэн бэлэмнэнэрэ наада”- диэн тылларын өссө санатыахпын баҕардым. Маннык ситиһиилээх дьоннор Эһиэхэ оҕолорго куруук холобур, олоххут суолугар ыйар сулус буоллуннар. Петр Софронович сырдык аата оҕолоругар уонна кини аатынан стипендиаттарыгар салҕанан бара турдун!
Давыдова В.Я, Ньурбатааҕы Эбии үөрэхтээһин киинин музейнай үлэҕэ методиһа.