Ньурба к. «Сардаана» оҕо уһуйаанын саҥа дьиэтэ үлэҕэ киирдэ. Олунньу 2 к. Ньурба к. Убайаан микро-оройуонугар 50 миэстэлээх «Сардаана» дьыссаатын таас дьиэтин аһыллыытын үөрүүлээх тэрээһинэ ыытылынна. Тэрээһиҥҥэ улуус, куорат, үөрэх салалтатын, тутуу-инвестиционнай управление салайааччылара, дьыссааттар дириэктэрдэрэ, төрөппүттэр уо.д.а. кытыннылар. Сахалыы сиэри-туому норуот талааннааҕа, алгысчыт уонна эмчит Алиса Иннокентьева ситэрдэ, аал уокка кымыһынан, алаадьынан айах тутта. Бу эбийиэги туппут «Туймаада» тутуу тэрилтэтин гендириэктэрэ Владимир Васильев истиҥник эҕэрдэлээн туран, уһуйаан дириэктэрэ Анастасия Григорьеваҕа дьиэ символическай күлүүһүн туттарда. Ааны туора тардыллыбыт аалай лиэнтэ быһа кырыйыллыбытын кэнниттэн, кэлбит ыалдьыттар иһирдьэ киирэн салама ыйаатылар.
2002 сылтан «Сардаана» дьыссаат дириэктэринэн ситиһиилээхтик үлэлии сылдьар Анастасия Григорьева тэрилтэ үлэтин-хамнаһын, ситиһиилэрин билиһиннэрдэ. Оҕо уһуйааныгар 3 бөлөҕүнэн 63 кырачаан сылдьар. 32 үлэһиттээх кэлэктиип кинилэр оҕо саастарын дьоллоохтук, баай ис хоһоонноохтук атааралларын туһугар бары күүһүн-сыратын ууран туран үлэлиир. Оҕо саадын дьиэтэ бэдэрээтчитигэр табыллыбакка кыайан тутуллубакка турбутун, «Туймаада» тутуу тэрилтэтэ ылан, былырыын кулун тутарга бастакы сыбаайаны түһэрэн баран, бу бүтэрэн үлэҕэ киллэрдэ.
Алексей Иннокентьев эҕэрдэ тылыгар улуус баһылыгынан үлэтин саҕалыаҕыттан, 3-с оҕо уһуйаана үлэҕэ киирэр үөрүүлээх тэрээһинигэр кыттарын этэн туран, тутааччыларга истиҥ махталын тиэртэ. Кини 2014 с. Ньурба куорат баһылыгын быыбарыгар кыттарыгар «Сардаана» дьыссаат кэлэктииибин кытта көрсүһэригэр, киниэхэ саҥа оҕо уһуйаанын дьиэтин туттарарга накаас биэрбиттэрин аҕынна. Маны өрөспүүбүлүкэтээҕи Үтүө дьыала хамсааһынын былааныгар киллэртэрэн, улуустан үбүлээһини туруорсан, эбийиэги тутарга барбыт үлэни билиһиннэрдэ. Кини уһуйаан дириэктэрэ Анастасия Григорьеваҕа «СӨ үөрэҕин туйгуна» бэлиэни , Эҕэрдэ суругу уонна 10 тыһ. солк. суумалаах сэртипикээти , тутааччыларга Махтал суруктары туттарда.
Салгыы эҕэрдэ тылы Ньурба к. хаһаайыстыбатын көрөр-истэр сулууспа (СЭГХ) салайааччыта Дмитрий Михайлов, улуустааҕы үөрэх салалтатын салайааччыта Алевтина Аргунова, ИСУ салайааччыта Макар Семенов, баһаарынай сулууспа салайааччыта Михаил Булкин, төрөппүттэр кэмитиэттэриттэн Саргылана Федорова эттилэр, бэлэх-туһах туттардылар. Уһуйаан дириэктэрэ Анастасия Григорьева тэрилтэ саҥа дьиэтин тутуутугар көмөлөспүт бары салайааччыларга уонна тутааччыларга истиҥник махтанна. Тэрээһини дьыссаат оҕолорун, выпускниктарын уонна Алена Павлова-Иудина эҕэрдэ нүөмэрдэрэ киэргэттилэр. «Сардаана» дьыссаат дьиэтэ өрөспүүбүлүкэтээҕи «Мин Сахам сирэ -21 үйэҕэ» Үтүө дьыала хамсааһын уонна улууска алмаастан киирэр үп суотугар тутулунна. Барыта холбоон 60 мөл. солк. суумалаах. Амма Бөтүҥүттэн төрүттээх Владимир Васильев салайааччылаах «Туймаада» СК 2007 сылтан тутуунан дьарыктанар. Тыа хаһаайыстыбатын эбийиэктэрин — уу ситимнэрин, ууну ыраастыыр ыстаансыйалары туталлара, Дьокуускайга араас хайысхалаах социальнай эбийиэктэргэ үлэлээбиттэрэ. Ол курдук диализнай киини саҥаттан туппуттара, оҕо уһуйааннарын өрөмүөннээбиттэрэ. Ньурбаҕа уһуйаан дьиэтин тутуутугар учаастак салайааччыта Арсентий Соловьев салайааччылаах биригээдэ үлэлээтэ. Ньурба к. тутааччыларыттан «Стройкомфорт» тэрилтэ (Анатолий Степанов) биригээдэтэ үлэлээтэ. Ону таһынан ИП «Николай Протопопов» уонна Николай Сотников «Сахастройтранс» тэрилтэтэ үлэлэстилэр. Сүрүннээн олохтоох тутуу тэрилтэлэрэ оҥорон таһаарбыт матырыйааллара туһанылынна. «Туймаада» СК салалтата дьыссаат таһынааҕы тупсаран оҥоруутун ыам ыйыгар-бэс ыйын саҥатыгар бүтэрэргэ былаанныыллар. Баһаарынай емкость уонна оҕо былаһаакката туруоруллуохтаахтар.
*Ньурба улууһун дьаһалтатын пресс-сулууспата*