Сир күнүгэр аналлаах экологическай сбор алын кылаастарга быйыл куйаар ситимин нөҥүө муус устар ыйга ыытыллыбыта. Үгэс курдук экосборга үһүс кылаас оҕолоро кыттыыны ылбыттара.
Экосбор тэрээһинин чэрчитинэн оҕолор дэриэбинэлэрин, оскуолаларын территорияларыгар, оҕо оонньуур балаһааккаларыгар, сквердэргэ экологическай десаннары тэрийэн ыыппыттара. Ону
тэҥэ оскуолаларыгар үлэлии турар экологическай проектары, быраҕыллар матырыйаалтан спортивнай мал-сал оҥорон, физминутка толкуйдаан таһааран видеоҕа устан, хаартыскаҕа түһэрэн аныгы мультимедийнай технологиялары таба туттан үлэлэрин отчуоттаабыттара.
Хаһыс да сылын экосбор кыттааччылара оройуон оскуолаларын үһүс кылааһын үөрэнээччилэрэ Ньурба куораппыт тупсаҕай көрүҥнэнэригэр бэйэлэрин сэмэй кылааттарын киллэрэллэр.Ол курдук сибэкки рассадалларын үүннэрэн, көрөн-истэн куорат сквердэригэр олордоллоро. Быйылгы тэрээһини Антоновка орто оскуолатыгар өр сылларга директорынан үлэлээбит РСФСР үөрэҕириитин туйгуна, САССР оскуолатын үтүөлээх учуутала, Аҕа дойду сэриитин кыттыылааҕа Захаров Афанасий Титович 100 сааһын туолар кэрэ-бэлиэ күнүгэр ананна. Онон бу күҥҥэ анаан үүннэриллибит 100 устуука кэрэ сибэккилэр Ньурба куораппыт Кыайыы болуоссатыгар бэс ыйын 9 күнүгэр оройуон үһүс кылааһын үөрэнээччилэрин уонна кинилэр учуууталларын илиилэриттэн олордулунна. Тэрээһин кыттыылаахтарын бу түгэнинэн Ньурба оройуонун үөрэҕириитин кылаабынай специалиһа Васильева Варвара Прокопьевна уонна Захаров А.Т. сиэнэ Ньурба оройуонун үөрэҕириитин специалиһа Захарова Александра Николаевна эҕэрдэлээтилэр.
Бастакы сибэккини олордууну Афанасий Титович сиэнэ Александра Николаевна үөрүүлээх быһыыга-майгыга олордон саҕалаата.
Күөх Ньурбабыт кэрэ көстүүлэригэр оҕолор бэйэлэрин сибэккилэрин бэлэх ууннулар. Тапталлаах Ньурбабыт сибэккинэн симэнэн, күөҕүнэн чэлгийдин! Ийэ сирбитин харыстыаҕыҥ диэн барыгытын ыҥырабыт.
Антоновка алын кылаас учууталларын холбоhугун салайааччыта Николаева А К суруйда.