Актыбыыстар түмсүүлэрэ
Алтынньы 22 күнүгэр Ньурба оройуонун Акана орто оскуолатыгар актыбыыстар слёттара буолан ааста. Бу тэрээһини үөрэх салалтата, Акана оскуолата уонна “Дьулуур”, РДШ хамсааһынын тэрийээччилэрэ иилээн-саҕалаан ыыттылар.
Хаҥалас, Акана, Чаппанда, Маар, Сүлэ, Ньурба гимназията, Тэхничэскэй лицей, Ньурба 2-с оскуолата уонна “Ньурба эрэллэрэ” хамаанда тэринэн көхтөөх кыттыыны ыллылар. Актыбыыс оҕолор мустаннар араас оонньуулары, дьарыктары, акциялары ыыттылар, кыттыстылар. Кинилэр 4хайысханнан үлэлээтилэр: военно-патриотическай, гражданскай активность, информационно-медийнай, личностнай сайдыы. Оҕолор араас роликтары, трениннары, семинардары тэрийдилэр. Лааҕырдарга, тэрээһиннэргэ саататар аниматор буоларга эмиэ үөрэннилэр. Бэйэ бэйэлэрин кытары билсэн, кэпсэтэн бириэмэлэрин биллибэттик атаардылар. Көрсүһүү олус интэриэһинэйдик ааста.
Бу күн актыбыыстары кытары Ньурба оройуонун салалтатын эдэр ыччаты кытары үлэтин салайааччыта Валерия Владимирова көрүстэ. Кини оҕолор төрөөбүт, улааппыт дойдуларыгар патриот буолуохтаахтарын уонна үөрэхтэригэр кыһаллан үөрэнэн, дойдуларын сайдыытыгар бэйэлэрин кылааттарын киллэрэллэригэр эттэ. Онтон оройуон салалтатын өттүттэн көхтөөх, сайдыылаах, ситиһиилээх оҕолору өйөөһүн баар буолуо диэтэ.
Акана оскуолатын педагог-организатора Соркомова Анна Прокопьевна, оройуоҥҥа оҕо хамсааһынын саамай көхтөөх киһитэ, бу күн эмиэ барытын үрдүк таһымҥа тэрийэн ыытта.
Россия оскуолаларын оҕолорун хамсааһынын уонна Саха сирин “Дьулуур” оҕо тэрилтэтин Ньурба оҕолоро өйүүллэр уонна итиннэ кыттыһаллар. Ону актыбыыс оҕолор бу күн мустан туоһулаатылар.
Анжелина Жданова
ЫЛЛЫК эдкорпост