Саха тылын, литератууратын уонна култууратын учууталларын иккис сийиэһэ түмүктэннэ. Онно барыта 500 делегат 35 оройуонуттан кытынна.
Түмүк мунньаҕы Ил Түмэн государственнай Мунньаҕын Председателин бастакы солбуйааччы Александр Жирков, республика Правительствотын вице- премьерэ Сергей Местников уонна Саха сирин үөрэҕин уонна наукатын министрин бастакы солбуйааччыта Алевтина Аргунова ыыттылар.
Түмүк мунньахха сийиэскэ үлэлээбит аҕыс түһүлгэлэр салайааччылара резолюцияҕа киирэр этиилэрин иһитиннэрдилэр.
Саха тылын учууталларын сийиэһэ үрдүк тэрээһиннээхтик ааста. Сийиэс резолюциятыгар киирбит этиилэрин бары сомоҕолоһон, ситимнээн күүскэ үлэлээтэхпитинэ олоххо киириэхтэрэ диэн туһаайдылар. Саха тылын, литератууратын уонна култууратын учууталларын үһүс сийиэһин үс сылынан тэрийиэххэ диэн түмүк мунньахха этии киирдэ.
Ньурба улууһуттан 21 делегат сийиэскэ кытынныбыт. Түһүлгэлэринэн сылдьан өрөспүүбүлүкэ араас улууһуттан сылдьар учууталлар, арааһынай түмсүүлэр, төрөппүттэр маастар кылаастарын, сэмэнээрдэрин көрдүбүт биһирээтибит. Төгүрүк остуоллар аһаҕас кэпсэтиилэригэр кытынныбыт, бэйэбит санаабытын, этиилэрбитин ирэ-хоро кэпсээтибит, эттибит. Саха тылын кэнсиэпсийэтин ырыттыбыт, онно этиилэрбитин киллэрдибит, салҕыы сийиэскэ тэриллибит айар бөлөхтөр үлэлиэхтээхтэр.
Сийиэс түмүктүүр мунньаҕын кэнниттэн Саха Өрөспүүбүлүкэтин Судаарыстыбаннай Мунньаҕын (Ил Түмэн) бэрэссэдээтэлин солбуйааччытын Антонина Афанасьевналыын, уонна Судаарыстыбаннай тутууга уонна олохтоох салайыныыга бастайааннай комитет бэрэссэдээтэлин Владимир Михайловичтыын кытта Ил Түмэн мунньахтыыр дьиэтигэр көрүстүбүт. Көрсүһүүгэ бары итии чэйдээх олорон Ньурба улууһа сайдыытыгар араас үлэ барарын, хамнас үрдээһинин, тутулла турар эбийиэктэргэ үп-харчы көрүллэрин туһунан кэпсээтилэр. Бүтэһиккэ Ньурба сийиэс делегаттарыгар Саха Өрөспүүбүлүкэтин Судаарыстыбаннай Мунньаҕын (Ил Түмэн) махтал суругунан наҕараада туттардылар.
Саха тылын, литератууратын уонна култууратын учууталларын иккис сийиэс Ньурба улууһун делегаттарыттан тэрийээччилэргэ, ытааччыларга, атын улуус делегаттарыгар баҕарабыт сийиэс резолюцията олоххо киирэригэр алмаас курдук кытаанах доруобуйаны, айар үлэҕитигэр иэйиини, үрдуктэн үрдүк ситиһиилэри.
Кириллина Евдокия, сийиэс делегата, Ньурбатааҕы оскуола иннинээҕи үөрэхтээһин отделын салайааччыта