Улуу убайбыт Ойуунускай төрөөбүтэ 130 сылын чэрчитинэн Дьаархан орто оскуолатыгар араас таһымнаах тэрээһиннэр ыытылыннылар. Былатыан Ойуунускай олоҕун – дьаһаҕын, дьиэ кэргэнин, айымньылаах үлэтин, оскуола үөрэнээччилэригэр билиһиннэрдилэр, билиилэрин тургутан викторина ыыттылынна. Ону таһынан бибилэтиэкэҕэ кинигэ быыстапката, Ойуунускай айымньыларынан уруһуй күрэҕэ, учууталларга “Улуу убайбыт Ойуунускай” педагогическай дьыктаан күрэҕэ ыыттылынна. Сэтинньи 13 күнүгэр кылаас салайааччылара “Ойуунускай саха норуотун чулуу уола” диэн кылаас чаастары ыыттылар. Сэтинньи 15 күнүгэр Д. С. Жиркова аатынан спорт уонна норуот айымньытын киинигэр »Кэриэһим кэннибэр хааларым, Кэхтибэт кэрэкэ тылларым» тэрээһин бэрт истиҥник, сэргэхтик ааста. Кулууп дьиэҕэ оҕолор, төрөппүттэр тоҕуоруһа мустаннар олохтоох оскуола эдэр учууталлара Спартак Иванов уонна Сардаана Федорова бэлэмнээбит »Былатыан Ойуунускай олоҕун кэрчиктэрэ» слайданан иһитиннэриитин сэҥээрэн иһиттилэр. Ол кэннэ »Хатан» ааҕааччылар бөлөхтөрө П. Ойуунускай хоһоонунан »Мөккүөр» остуоруйатын уустаан- ураннаан аахтылар. Олохтоох куукула тыйаатырын режиссера Линаида Терентьева Былатыан Ойуунускай »Оҕо куйуурдуу турара» айымньытын сырдатта. Саха тыла уонна улуу суруйааччы быстыспат ситимнээхтэрин эттэ. Ол кэннэ куукула тыйаатырын артыыстара, »Мичийээнэ» оҕо куукула устуудьуйатын оҕолоро »Оҕо куйуурдуу турара» куукуланан туруорууну көрдөрдүлэр. Көрөөччүлэр ытыс тыаһынан хайҕалларын биллэрдилэр. Устуудьуйа оҕолоро Иван Васильев, Ваня Конощук, Ян Егоров, Максим Тимофеев бастакы оонньооһуннара буолла. Ити курдук улуу убайбыт Былатыан Ойуунускай 130 сааһын Дьаархан орто оскуолата уонна нэһилиэк олохтоохторо бэрт сэргэхтик көрүстүлэр, кытыннылар.
УЛУУ КИҺИ ОЙУУНУСКАЙ
предыдущий пост