Муус устар 5 күнүгэр В. Н. Иванов аатынан Дьаархан орто оскуолатыгар «Эдэр учуутал – 2024» оройуоннааҕы күрэҕэ үрдүк таһымнаахтык ыытылынна. Хас биирдии киһи олоххо, тус суолун тобулунуутугар, киһилии сиэргэ-майгыга иитиллиитигэр үөрэппит учууталларын сабыдыаллара сүҥкэн улахан буолар. Учуутал үлэтэ үгүс сыраттан, дьаныартан турар. Кини билиитэ – көрүүтэ күннэтэ кэҥээн, үксээн иһиэхтээх. Үөрэнээччини кытта таба сыһыан, араас толкуйдатар боппуруостары табатык уонна бириэмэтигэр туруоруу, оҕолору наука төрүттэригэр уһуйуу, интэриэһиргэтии онтон да атын бэрт элбэх сатабылы, үгүс сыраны, дьоҕуру эрэйэр.
Эдэр учуутал күрэххэ уопсайа 5 эдэркээн учууталлар күөн көрүстүлэр. Ол курдук Бочкарева Надежда Егоровна – Күндээдэ орто оскуолатын алын кылаас учуутала. Иванова Милена Прокопьевна — Н. И. Кочнев аатынан Хаҥалас орто оскуолатын алын кылаас учуутала. Шадрина Рената Харлампьевна – К. Д. Уткин аатынан Марха орто оскуолатын физкультураҕа учуутала. Мандарова Кэрэчээнэ Сергеевна – В. Н. Иванов аатынан Дьаархан орто оскуолатын алын кылаас учуутала. Белолюбская Татьяна Андреевна – С. П. Алексеев – Боһуут аатынан Чаппанда орто оскуолатыгар уруһуй уруогун учуутала кытыннылар. Кылаас чаастары, араатарскай сатабылларын, талба талааннаах дьоҕурдарын көрдөрдүлэр.
Уопсай күрэх түмүгүнэн «Муҥутуур кыайыылаах» Белолюбская Татьяна Андреевна уонна В. Н. Иванов хаан – уруу аймахтара туруорбут анал бириистэрэ туттарылынна. В. Н. Иванов аатынан Дьаархан орто оскуолатын анал бирииһэ туттарылынна Бочкарева Надежда Егоровнаҕа, үөрэх управлениятын профкомун анал бирииһэ туттарылынна Мандарова Кэрэчээнэ Сергеевнаҕа,
Саха омук сардаҥалаах сарсыҥҥытын туһугар өйдөрүн-санааларын, күүстэрин-уохтарын, билиилэрин-көрүүлэрин ууран, иитии-үөрэтии түбүктээх үлэтигэр, учуутал буолуу эппиэтинэстээх идэтигэр буһар-хатар эдэр коллегаларбытыгар баҕарабыт: эдэрдии эрчимҥит уҕараабатын, амарах сүрэххит сылааһа намыраабатын, баҕа санааҕыт барыта туолуохтун!