Маалыкай нэһилиэгэр тыа хаһаайыстыбатын сылын түмүктүүр, Степан Васильев аатынан сылгы собуота төрүттэммитэ 50 сылын уонна Нестер Климович Антонов төрөөбүтэ 80 сылын бэлиэтиир дьоро күн сэтинньи 18 күнүгэр бэлиэтэннэ.
Биһиги оскуолабытыгар “Антоновскай аа5ыылар” Саха Республикатын норуотун хаһаайыстыбатын үтүөлээх үлэһитэ, Российскай Федерация үөрэҕириитин туйгуна, Степан Васильев аатынан сылгы собуотун бастакы директора — Нестер Климович Антонов төрөөбүтэ 80 сылын бэлиэтиир Мэҥэдьэк түбэтин агрооскуолаларын үөрэнээччилэригэр научнай-практическай конференция тэрийдибит. Хатыыттан 11, Малдьаҕартан 15 үөрэнээччилэр кэлэн кыттыны ыллылар. Конференцияҕа уопсайа 37 оҕо дакылаат аахта. Конференция арыллыытыгар оскуола директора – Ушканов Ф.Ф., нэһилиэк баһылыга – Петрова Н.С., Ньурба улууһун депутаттарын сэбиэтин бэрэссэдээтэлэ – Евсеев С.И., Педагогическай Үлэ бэтэрээнэ, Маалыкай орто оскуолатыгар 40-ча сыл химия, биология, география учууталынан үлэлээбит, Нестер Климович бииргэ төрөөбүт балта – Марта Климовна Антонова кыттыыны ыллылар.
Нестер Климович уһулуччу талааннаах салайааччы, тутааччы уонна тыа хаһаайыстыбатынан утумнаахтык дьарыктаммытын иһин, конференциябыт кини үлэтин сүрүн 3 хайысхатынан үлэлээтэ. 1 секция – тыа хаһаайыстыбатын науката (животноводство, коневодство, растениеводство), сүрүн экспердынан биология учуутала — Иванова С.С., 2 секция – историческай наука (музееведение, этнология, краеведение) сүрүн экспердынан история учуутала – Тимофеев А.И., 3 секция – техническай наукаҕа сүрүн экспердынан физика учуутала – Васильева Т.Н. үлэлээтилэр.
Секциянан үлэбит 3 чаас кэриҥэ барда. Ханнык баҕарар күрэххэ, бастыҥтан бастыҥы талаллар. Ол курдук, биһиги дьүүллүүр сүбэбит маннык түмүгү таһаарда:
Историческай наука секциятыгар 1 м. – Касьянова Кыыдаана,Семенова Аурика Малдьаҕар орто оскуолатын 6 кыл. үөрэнээччилэрэ, 2 м. — Винокуров Владик 10 “а” (Маалыкай), 3 м. – Иванов Александр 8 кыл. (Малдьаҕар), поощрительнай грамотанан наҕараадаланнылар: Кондратьев Ефрем, Егорова Саина 9 “а” (Маалыкай), Торохова Евгения 11 “а” (Маалыкай), Макаров Олег 9 кыл. (Хатыы).
Тыа хаһаайыстыбатын секциятыгар: 1 м. – Семянова Сандаара 7 “б” (Маалыкай), 2м. — Тимофеева Анна 9 кыл. үөрэнээччитэ (Хатыы), 3м. – Махатырова Анна 11 “а” (Маалыкай), поощрительнай грамотаҕа тигистилэр: Егоров Василий 9 кыл. (Малдьаҕар), Анисимов Иван 7 кыл. (Хатыы).
Техническай секцияҕа: 1 м. – Семянова Саина 10”а” (Маалыкай), Львов Саша 10 “а”, (Маалыкай), Седалищева Роза 10 “б” (Маалыкай), поощрительнай грамотаны Васильева Александра 11 кыл. (Хатыы) ыллылар. Бу курдук наука эйгэтигэр маҥнайгы хардыыларын оҥорбут үөрэнээччилэр түбүктээх үлэлэрэ сыаналанан үөрүү-көтүү көтөллөнөн тарҕастылар.
Онон Маалыкайга эрэ буолбакка, Мэҥэдьэк түбэтигэр, Ньурба улууһугар, Саха сиригэр уһулуччу талааннаах салайааччы, тутааччы – Нестер Климович Антонов аата өссө да өр сылларга ааттана туруо диэн эрэнэбит.
АЛЕНА КАЗАКОВА