Кулун тутар 21 күнүгэр Ньурба №2 оскуолатыгар Саха АССР үтүөлээх учуутала, норуот үөрэҕириитин туйгуна, «Бочуот знага», «Кыһыл Сулус», «Октябрьскай революция» орденнар кавалердара М.С.Егоров аатын иҥэрии үөрүүлээх быһыыга-майгыга буолан ааста. Сарсыардаттан ветеран учууталлар уонна Михаил Софронович оҕолоро кылаас чаастарын ыыттылар. Лоп курдук 11 чааска үөрүүлээх түгэн саҕаланна. Оскуола вывескатын Михаил Софронович оҕолоро, оскуола ситиһиилээх үөрэнээччитэ Алеша Рожин, оскуола дириэктэрэ Руслан Васильевич Андреев астылар. Тэрээһин салгыы оскуола аактабай саалыгар көстө. Үөрүүлээх тэрээһин ыалдьыттарынан буоллулар улуус администрациятыттан Халанникова В.С., Ньурба куоратын салайааччыта Иванов А.И., ветераннар советтарытан Иванов М.И., Дьокуускай куораттан оҕолоро Сидорова Маргарита Михайловна- омук тылын учуутала идэлээх, уһулуччу үрдүк категориялаах учуутал, Россия уопсай үөрэхтээһинин Бочуоттаах үлэһитэ, үлэ ветерана, педагогическай наука кандидата, «За доброе сердце и профессионализм» бэлиэ хаһаайката, Егорова Елизавета Михайловна— Ленинградтааҕы гидрометеорологическай институту бүтэрэн, республика Гирометкиинин синоптигынан үлэлиир. Россия гидрометсулууспатын Бочуоттаах үлэһитэ, үлэ ветерана, Егоров Вячеслав Михайлович— Выборгскай авиационнай училищены бүтэрэн, МИ-8 вертолет механигынан үлэлээбитэ. Саха сирин авиациятын ветерана, «7000часов безаварийного полета» бэлиэ хаһаайына, үлэ ветерана, билигин бочуоттаах сынньалаҥҥа олорор,Егорова Капиталина Михайловна— СГУ медицинскэй факультетын бүтэрбит үрдүк категориялаах врач, Дьокуускай куорат клиническай балыыһатын гастроэнтерологическай отделениетын сэбиэдиссэйэ, «Барҕарыы» фонд стипендиата, СР доруобуйын харыстабылын туйгуна, СР үтүөлээх бырааһа,үлэ ветерана, медицинскэй наука кандидата, Егоров Виталий Михайлович- СГУ историко-филологическай факультетын нуучча тылын отделениетын бүтэрбитэ, оперативниктан саҕалаан ИДЬМ криминальнай милициятын начальнигын солбуйааччытыгар,СР ИДЬМ куттала суох буолуу отдел начальнигар тиийэ үлэлээбитэ, СР ИДЬМ Бочуотун Дуоскатыгар киллэриллибитэ. «Адычанская трагедия», «Воздаяние монстру», «Кара Чочур Мурана» кинигэлэр автордара, Егоров Валерий Михайлович— СР спецсибээһин Управлениетын үлэһитэ, Россия спецсибээһин Бочуоттаах үлэһитэ. Ыалдьыттар Михаил Софронович туһунан презентацияны, олоҕун кэрдиис кэмнэринэн туруоруллубут инсценировкалары долгуйа көрдүлэр, тоҕоостоох ырыалары, үҥкүүлэри дуоһуйа иhиттилэр. Михаил Софронович о5олоро оскуола бастыҥ үөрэнээччитигэр Дыдорова Алиадаҕа сылын аайы ананар бастакы стипендияларын туттардылар. Маны таһынан Михаил Софронович директордаабыт ыччат киэһээҥҥи оскуолатын, Ньурба№3 оскуолатын араас сылларга үөрэнэн бүтэрбит выпускниктар, директордарын туһунан истиҥ- махтал тылларынан ахтан-санаан аастылар.
Ньурба иккис нуомэрдээх оскуолатыгар М.С.Егоров аата иҥэрилиннэ.
предыдущий пост