«Мой первый урок» улуустааҕы эдэр учууталлар күрэхтэрэ
Сэтинньи 30 күнүгэр, С.Васильев аатынан Ньурба 1 №-дээх орто оскуолатыгар үгэс буолбут «Мой первый урок» диэн күрэхтэрэ буолан ааста. Манна үөрэхтэрин саҥа бүтэрэн үлэлээн эрэр уонна биир сыл стажтаах педагогтар уруоктарын көрдөрдүлэр. Сорохтор аһаҕас уруогу ыытааһыҥҥа маҥнайгы холонуулара буолан, сүрдээҕин долгуйаллар. Ол эрээри, кыттааччылар үчүгэй бэлэмнээхтэрин, наставниктар бэлэмнииргэ көмөлөспүттэрэ көстөрүн, дьүүллүүр сүбэ бэлиэтээтэ.
Күрэх дьүүллүүр сүбэтигэр улуус методическай холбоһуктарын салайааччылара, уопуттаах учууталлар уонна Ньурба эдэр педагогтарын ассоциациятын бэрэстэбиитэллэрэ үлэлээтилэр. Уопсайа 5 бөлөҕүнэн арахсан уруоктары сыаналаатылар.
«Мой первый урок» 11 араас оскуолаттан, уопсайа 18 эдэр учууталы биир сиргэ түмтэ. Ырааҕын аахсыбакка Хорулаттан, Маартан, Мархаттан кэлэн кыттыбыттара үөрдэр.
Уруоктар быыстарыгар кыттааччылартан уонна экспердэртэн күрэх туһунан санааларын иһиттибит:
Кондратьева Наталья Николаевна – Ньурба тех лицейин математикаҕа учуутала
- Миирнэйдээҕи политехническэй институту бүтэрэн, саҥардыы үлэлээн эрэбин. Маннык хабааннаах күрэххэ маҥнайгы кыттыым буолан олус долгуйабын. 10 кылаас үөрэнээччилэригэр «Степень с рациональным показателем» диэн уруогу ыытаары бэлэмнэнэ сылдьабын.Үөрэтиэхтээх оҕолорум бу тиэмэни саҥа саҕалыахтаахтар, саҥа тиэмэҕэ киирии уруога буолуохтаах.
Петрова Майя Петровна – Дьиикимдэ орто оскуолатын начальнай кылаас учуутала
- Дьиикимдэ оскуолатыгар маҥнайгы сылбын үлэлии сылдьабын. Кылааспар икки үөрэнээччилээхпин. Бүгүн окружающий мир уруогун ыыттым, «Будь природе другом» диэн ааттаах, проектнай үлэ. Оҕолор паранан үлэлээтилэр. Кылааска элбэх үөрэнээччи буолан уруок сэргэхтик ааста. Үөрэнээччилэр уруок бүтэһигэр бэйэлэрэ кинигэ оҥорон таһаардылар. Санаабар, уруогум туруоруллубут сыалын ситтэ. Оҕолор физминутканы, проектнай үлэни сөбүлээтилэр.
Афанасьев Алексей Борисович – Ньурба улууһун эдэр учууталларын ассоциациятын председателэ, тех лицей географияҕа учуутала
- Бу күрэххэ кыттан эдэр педагогтар идэлээх таһымнарын үрдэтэллэр, атыттары көрөн сайдаллар, опыт ылаллар. Хаһыс да сылбын эксперт быһыытынан сырыттым. Хас сыл ахсын учууталлар бэлэмнэниилэрин таһыма үрдээн иһэр. Ол эрээри быйыл кыттааччыбыт ахсаана аҕыйах соҕус.
Түмүгэр, бөлөхтөн биирдии бастыҥы уонна абсолютнай кыайыылааҕы таһаардылар. Ол курдук, бэйэлэрин бөлөхтөрүгэр кыайыылаах буоллулар, Свешникова Н.А. (Марха орто оскуолата), Григорьева Д.И. (1 №-дээх орто оскуола), Бойтунова А.А. (Дьаархан орто оскуолата), Семенов Руслан Павлович (1 №-дээх орто оскуола), Сыромятникова С.Г. (Марха орто оскуолата) уонна муҥутуур кыайыылааҕынан буолла К.Д. Уткин аатынан Марха орто оскуолатын химияҕа учуутала Свешникова Н.А. буолла.
Кыайыылаахтары эҕэрдэлээн баран, кыттааччылар төгүрүк остуолга мустан үлэ түмүгүн дьүүллэстилэр, санааларын үллэһиннилэр. Ассоциация бэрэссэдээтэлэ Афанасьев А.Б. уонна Васильев С.В. сыллааҕы үлэ торумун, саҥа бырайыактары билиһиннэрдилэр. Саҥа үлэлээн эрэр учууталлары инникитин даҕаны маннык көхтөөх буолалларыгар ыҥырдылар.
Бу тэрээһини көҕүлээн ыыппыт улуус үөрэҕириитин салалтатыгар, күүс-көмө буолбут учууталларга, С. Васильев аатынан Ньурба 1 №дээх оскуолатын үлэһиттэригэр улахан махталбытын тиэрдэбит.
АМП пресс-киинэ бэлэмнээтэ