Ньурбаҕа бу күннэргэ «Саха КВН» оскуола оҕотугар улуустааҕы түһүмэҕэ «Кыталык» КД саалатыгар толору көрөөччүнү муста. Манна 14 хамаанда, уопсайа 108 оҕо кыттыыны ылла. Ол курдук «Ыстапаан сиэннэрэ» — Ньурба куорат 1 нүөмэрдээх оскуолата, «Убайаан оҕолоро» — Убайаан оскуолата, «Одун» — техническэй лицей, «Айыы оҕолоро» — Ньурба куорат 2 нүөмэрдээх оскуолата, «Көрүдьүөс оҕолор» — Хорула, Өҥөлдьө уолаттара» — Өҥөлдьө, «СМАК» — Маар, «Дохсун» — Ньурбачаан, «Мэҥэдьэк мэниктэрэ» — Хатыы, «Үчүгэй уолаттар» — Чаппанда, «Эрэл» — Дьиикимдэ, «Халлаан дьонноро» — Марха, «Алаас оҕолоро» — Маалыкай, «Һуу –һаа» — ЦДНТТ үөрэнээччилэрэ көргө-күлүүгэ, сытыы өйгө күөн көрүстүлэр.
Тэрээһини улуустааҕы үөрэҕирии управленията, Оҕону иитэр-сайыннарар киин уонна Ньурба эрэлэ» оҕо общественнай түмсүүтүн салайааччыта Семен Яковлев көҕүлээн ыыттылар. Ыытааччы быһыытынан күрэҕи Антоновкатааҕы «Түһүлгэ» норуот айымньытын киинин режиссера Петр Белолюбскай киэргэттэ.
Оонньуу үс түһүмэҕинэн ыытылынна. Бастакы – «Биһиги күүспүт туохха сытарый?». Иккис – ыйытынньык түһүмэҕи. Үһүс «Кэпсээн эбиилээх, хоһоон омуннаах» дьиэтээҕи сорудах түһүмэҕэр кыттааччылар эрдэттэн бэлэмнэнэн аҕалбыт миниатюраларын көрдөрдүлэр.
Дьүүллүүр сүбэҕэ СӨ култууратын, ыччат бэлиитикэтин туйгуна, өрөспүүбүлүкэҕэ биллэр «Тэбэнэт» КВН хамаанда салайааччыта «Түһүлгэ» норуот айымньытын киинин худ. салайааччыта Ньургуйаана Матвеева; улуустааҕы ыччат бэлиитикэтин управлениятын салайааччыта, «Тэбэнэт» кыттыылааҕа, «Саха КВН» хас да төгүллээх призера – Нестер Пахомов, оҕону иитэр, сайыннарар киин дириэктэрин солбуйааччыта – Марфа Жендорусова, улуустааҕы үөрэҕирии управлениятын иитэр салаа сүрүн исписэлииһэ Сардана Васильева, «Тэбэнэт» кыттыылааҕа, «Саха КВН» хас да төгүллээх призера, региональнай оонньууга «Мистер Саха КВН» аата хаһаайына – Иннокентий Тогонохов, ЦДНТТ робототехника педагога – Дьулустаан Николаев үлэлээтилэр.
Хас түһүмэх ахсын үстүү хамаанда кыттыбытын кэннэ дьүүллүүр сүбэ сыаналарын этэн истилэр. Ол курдук оонньуу түмүгүнэн үһүс миэстэ – «Одун» — техническэй лицей (сал. Александра Федорова),
Иккис – Өҥөлдьө уолаттара» (сал. Семен Поликарпов) буоллулар. Онтон кыайыы үрдэлигэр «Ыстапаан сиэннэрэ» — Ньурба куорат 1 нүөмэрдээх оскуолата (сал. Светлана Васильева, Дина Егорова, Александр Егоров) таҕыстылар. Маны таһынан чаҕылхай оонньооччуларга «Мистер Саха КВН» — Александр Иванов
(«Ыстапаан сиэннэрэ»), «Мисс Саха КВН» — Филиппова Аня 10кл (Көрүдьүөс оҕолор) аат иҥэрилиннэ. Оннук 10 анал аат иҥэрилиннэ. Бастаабыт уонна иккис миэстэни ылбыт хамаандалар ахсынньы 8-9 күннэригэр Сунтаарга буолар региональнай түһүмэххэ улуус аатыттан кыттыыны ылыахтара.
Автор: Варламова Александра