Өрөспүүбүлүкэҕэ да, улуустарга да биллэр агрооскуолалар олус таһаарыылаахтык үлэлии олороллоруттан киһи үөрэр. Бу оскуолалар үөрэҕи кытта үлэни тэҥҥэ ситимнээн үлэлии-хамсыы, айа- тута сылдьаллар. Агрооскуола үөрэнээччилэрэ тыа хаһаайыстыбатын инники кэскиллэрэ буолаллар.
Ньурбачаан орто оскуолата 2009 сылтан агрооскуола буолан үлэлии-хамсыы турар. Ол курдук, сайынын араас оҕуруот аһын олордон, сибэккилэри үүннэрэн, от оттоон кыһынны кыстыкпытын булабыт. Бу олордубут оҕуруоппут аһын оҕолор бэйэлэрэ сайынын лааҕыр кэмигэр бүөбэйдээн кыһын сиир астарын булуналлар. Оскуолабыт сүрүн хайысхата коза уонна сылгы иитээһинэ буолар. Билиҥҥи туругунан 14 төбө сылгы, 24 төбө коза баар, маны таһынан, биһиги түргэнник ситэр салааҕа цесаркалары, индюктары иитэбит. Кыратык коза туһунан кэпсиир буоллахха, кини үүтэ киһи доруобуйатыгар олус туһалаах, эмтээх. Онон сиэттэрэн инникитин козаларбытын элбэтэн үүтүн оҥорон таһааран атыылыыр былааннаахпыт. Былырыыҥҥы үөрэх дьылыгар, Ньурба улууһун аҕа баһылыга, А.М. Иннокентьев уонна кини солбуйааччыта, А.Я.Яковлев оскуола былаанын өйөөн 1500 мөл.солк. харчыны саҥа коза ферматын тутуутугар көмөлөспүттэрэ. Ол козафермабыт аны күһүн үлэҕэ киирээри бэлэм турар. Бу фермабытыгар козаны ыыр аппараат, холодильник о.д.а. араас аныгы тэриллэр, аппарааттар сакаастанан кэлиэхтээхтэр. Онтон түргэнник ситэр кыылларбытыттан ордук индюкпутун кытта ылсан эрэбит. Индюгу үөрэнээччилэрбит бэйэлэрэ көрөн-истэн, чинчийэн бараннар сыл аайы буолар агрооскуолалар үөрэнээччилэрин икки ардыларыгар ыытыллар «Начинающий фермер» интеллектуальнай оонньууга быйыл иккис төгүлүн бастаатылар. Манна кинилэр индюк этин атыылааһын, түүтүн туһаҕа таһаараарыы туһунан бизнес былааннарын сырдаппыттара. Индюкпутун элбэтэр туһуттан инкубаторга сымыттарын уган холонобут. Онтон былырыын бу күрэххэ коза үүтүн атыылааһын уонна ферма тутуутун туһунан бырайыагы көмүскээн өрөспүүбүлүкэҕэ кыайыылааҕынан ааттаммыттара. Онон үөрэнээччилэрбитинэн киэн туттабыт. Хас биирдии оҕо үлэҕэ сыста үөрэниэхтээх. Онтон агрооскуола үлэҕэ оҕону өссө чугастык уһуйан иитэрэ ол хайҕабыллаах!
05.05.2020 с, Ньурбачаан орто оскуолата.