🚌 Үөдэй оскуола-саада саҥа оптуобустанна!
Бүгүн СӨ Ил Дархана Айсен Сергеевич Николаев өрөспүүбүлүкэ 17 оскуолатын, Жатайдааҕы техникум, «Бэс Чагда» оҕо сынньалаҥын уонна чэбдигириитин Киинин дириэктэрдэригэр саҥа оптуобус күлүүстэрин үөрүүлээх быһыыга-майгыга туттарда.
Оптуобустар РФ Бэрэсидьиэнэ Владимир Путин сорудаҕынан олоххо киллэриллэр бырагыраама чэрчитинэн ылылыннылар.
💬 В.А.Петрова аатынан Үөдэй начаалынай оскуола-уһуйаанын саҥа дьиэтэ бу сыл олунньу ыйыгар үөрүүлээхтик үлэҕэ киириитигэр СӨ Бырабыыталыстыбатын Бэрэссэдээтэлин солбуйааччыта Георгий Михайлович Степанов кэлэ сылдьан, бу үөрүүлээх түгэнинэн сибээстээн биһиэхэ оптуобус сэртипикээтин туттарбыта, дьэ ол оптуобуспутун тиийэн ыллым» — диэн Үөдэй оскуола-саадын дириэктэрэ Майя Алексевна Захарова үөрүүтүн үллэстэр.
Биһиги оскуола-уһуйааммыт төһө даҕаны кыра буолбутун иһин, улууспут баһылыга Алексей Михайлович Иннокентьев, улуустааҕы үөрэх управлениетын салайааччыта Федор Федорович Ушканов уонна өрөспүүбүлүкэ салалтата улахан болҕомтолорун ууран, бу массыынаны биһиэхэ бэлэхтээтилэр. Билиҥҥи кэмҥэ барарбытыгар-кэлэрбитигэр, оҕолорбутун таһарбытыгар оптуобус ылбыппыт олус үчүгэй. Бүтүн нэһилиэк дьоно-сэргэтэ бары үөрдүлэр. Онон бүгүн биһиги үөрүүбүт муҥура суох
🖇️ _Манна эбэн эттэххэ, дойду үрдүнэн оскуола оптуобустарын саҥардыы үлэтэ 2016 сылтан ыытыллар. Быйыл федеральнай бүддьүөттэн өрөспүүбүлүкэбитигэр оскуола оптуобустарын ыларга 61,2 мөл. солк. көрүллүбүтэ. Кэнники 4 сыл иһигэр дойду Бэрэсидьиэнин сорудаҕынан Саха сирэ 213 оптуобуһу ылла._
✍🏻 Геннадий Антонов
