Бүгүн, олунньу 17 күнүгэр, Кэмпэндээйи сэлиэнньэтигэр «Сир уустара» өрөспүүбүлүкэтээҕи үөрэтэр-чэбдигирдэр киин базатыгар Бүлүүтээҕи үөрэх форумун чэрчитинэн иккис төгүлүн ыытыллар педагогтар хамаандаларын региональнай куонкуруһа «ВИРУК — 2025» үөрүүлээх аһыллыыта буолла. Бэлиэтээн эттэххэ, бастаан куонкурус 2021 сыллаахха Ньурба улууһугар ыытыллыбыта. Онно Сунтаар педагогтатырын хамаандата кыайыылааҕынан тахсан көһө сылдьар кубогынан наҕарадаламмыта. Бу тэрээһин регионнааҕы профессиональнай педагогическай уопсастыбалар күүстэрин түмүүгэ уонна үөрэххэ көдьүүстээх уонна инновационнай ньымалары арыйыыга туһуланан ыытыллар.
Манна Бүлүү регионун түөрт улууһуттан талааннаах учууталлар кыттыыны ылаллар. Кыттааччыларга Сунтаар улууһун үөрэҕин салалтатын салайааччыта Борис Васильеев эҕэрдэ тылын эттэ, региональнай үөрэхтээһин ситимин сайыннарыыга конкурус суолтатын тоһоҕолоон бэлиэтээтэ уонна бары хамаандаларга көдьүүстээх үлэни баҕарда. «Юные якутяне» өрөспүүбүлүкэтээҕи ресурснай киин методиһа Мария Федорова уопут атастаһыытын уонна инновационнай педагогическай практиканы олоххо киллэрии суолтатын бэлиэтээтэ.
Куонкурус олунньу 16-22 күннэригэр «Сир уустара» өрөспүүбүлүкэтээҕи үөрэтэр-чэбдигирдэр киин базатыгар уонна Кэмпэндээйи орто оскуолатыгар ыытыллар. Кыттааччылар үөрэххэ бэйэлэрин билиилэрин-көрүүлэрин, сатабылларын уонна айар ньымаларын көрдөрөн кэккэ тургутууну ааһыахтаахтар:
* Хамаанда презентацията «Расскажи мне о себе» – профессиональнай интэриэстэрин көрдөрөр хамаанда чаҕылхай уонна оригинальнай көрдөрүүтэ.
* «Образовательный проект» — тыҥаан турар педагогическай соруктары быһаарыыга туһуламмыт инновационнай үөрэх бырайыагын көмүскээһин.
* «Час с классом» — уруок усулуобуйатыгар педагогическай мастарыскыайы көрдөрүү.
* «Педагогический СТиЭМ» — маастар-кылаас.
«ВИРУК — 2025» педагогтар хамаандаларын регионнааҕы куонкуруһа Бүлүү регионун үөрэҕин тиһигин сайыннарыыга дьоһун хардыы буолуо уонна үөрэх хаачыстыбатын үрдэтиигэ көмөлөһүө диэн эрэнэбит. Бары кыттааччыларга ситиһиини, өрөгөйү баҕарабыт!
