Олунньу 22 күнүгэр «Сир Уустара» өрөспүүбүлүкэтээҕи үөрэтэр-чэбдигирдэр киин базатыгар Бүлүү үөрэх форумун чэрчитинэн ыытыллыбыт «ВиРУК — 2025» учууталлар хамаандаларын куонкуруһа түмүктэннэ.
Куонкуруһу Сунтаар уонна Ньурба улууһун үөрэҕин салалталара «Юные Якутяне» өрөспүүбүлүкэтээҕи ресурснай киин көмөтүнэн тэрийэн ыыттылар. Экспертэр истэригэр киирдилэр: Сунтаар улууһун үөрэҕин салалтатын информационнай-методическай отдел сүрүннүүр исписэлииһэ Попова М.И., Ньурба улууһун үөрэҕин салалтатын салайааччытын бастакы солбуйааччы Васильев С.В., Үөһээ Бүлүү улууһун үөрэҕин салалтатын информационнай-методическай отдел сэбиэдиссэйэ Иванова М.С., Бүлүү улууһун үөрэҕин салалтатын информационнай-методическай отдел сүрүннүүр исписэлииһэ Дранаева К.В., «Сир Уустара» өрөспүүбүлүкэтээҕи үөрэтэр-чэбдигирдэр киин дириэктэрэ Филиппов А.А.
Тэтимнээх үлэ нэдиэлэтэ тиһэҕэр тиийэн, бэйэтин кэнниттэн регионнааҕы үөрэхтээһин сайдарыгар саҥа санаалары, тус сыаллаах үлэлэри хаалларда.
Куоҥкурус Бүлүү регионун араас муннуктарыттан хамаандалары түмэн инновационнай педагогическай бырайыактары олоххо киллэриигэ көдьүүстээх былаһаакка буолла.
Нэдиэлэ устата хамаандалар түөрт түһүмэҕи аастылар, төгүрүк остуолга кытыннылар, араас санааларын сааһылыыр, доруобуйаларын чэбдигирдэр процедуралары ыллылар уонна саамай сүрүнэ уопуттаах экспертэртэн сүбэлэрин-амаларын иҥэриннилэр.
Кыайыылаахтар уонна призердар дипломунан, бирииһинэн наҕараадаланнылар. Ол курдук, куонкурус түмүгэ маннык буолла:
1 истиэпэннээх ДИПЛОМ — »Крылья знаний» — Үөһээ Бүлүү улууһун оскуолаларын холбоһуктаах хамаандата;
2 истиэпэннээх ДИПЛОМ — »МАЯК» — Бүлүү улууһун П.А. Павлов аатынан 1 Күлээт орто оскуолатын хамаандата;
3 истиэпэннээх ДИПЛОМ — »Сайдыы» — Ньурба улууһуттан К.Д. Уткин аатынан Марха орто оскуолатын хамаандата.
Ону таһынан, «Куонкурус лидерэ» анал аат К.Д. Уткин аатынан Марха орто оскуолатын алын кылаас учууталыгар Ньургуйаана Павловна Егороваҕа ананна.
«ВИРУК -2025» куонкурус муҥутуур кыайыылааҕынан таҕыста “Gymnasia” Сунтаардааҕы гимназия хамаандата.
«Бу куонкуруска кыттыбыппыт үчүгэй көрдөрүү буолар, бэйэбит күүспүтүн бэрэбиэркэлэнэн, уопут атастаһан, ону тэҥэ сынньанан олус астына сылдьабыт. Куоҥкурус үрдүк таһымҥа ааспытын бэлиэтиэхпитин баҕарабыт, саҥаны биллибит-көрдүбүт, салгыы үлэлииргэ күүс эбиннибит», — диэн кыттааччылар бэлиэтииллэр.
«ВИРУК — 2025» куонкурус үөрэх хаачыстыбатын үрдэтиигэ дьоһун хардыы буолла. Тэрийээччилэр олохтообут сибээстэрэ Бүлүү регионун профессиональнай педагогическай уопсастыбалара салгыы сайдалларыгар уонна бөҕөргүүрүгэр көмөлөһүө диэн эрэллэрин биллэрдилэр. Кыайыылаахтары уонна призердары эҕэрдэлиибит, инникитин саҥа саҕахтары баҕарабыт! #ВОФ2025 #ВИРУК #СирУустара
