2018 сыл тосунньу 19 күнүгэр А.Н. Чусовской аатынан Ньурбатааҕы техническэй лицейгэ уһулуччу үрдүк категориялаах саха тылын уонна литературатын учуутала Мясоедова А.В. «Айар тыл уоттаннын» (төрөөбүт литература уруогар оҕо айар дьоҕурун сайыннарыы) диэн ааптарскай методическай сэминээрэ буолан ааста.
Сэминээргэ улуус оскуолаларыттан 30тан тахса саха тылын, литературатын уонна төрүт культуратын учуутала кыттыыны ылла. Ыраах сытар нэһилиэктэртэн Хатыыттан, Маалыкайтан, Малдьаҕартан уонна Чуукаартан киирэн кыттыыны ылбыттара үөрдэр.
Тэрээһин чэрчитинэн Мясоедова А.В. «Дорҕоон. Тыл. Этии» диэн 5 кылааска саха тылын, «П.А. Ойуунускай «Кыһыл ойуун» айымньытынан усулуобунай уобарас суолтата” диэн 10 кылааска литература уруоктарын ыытта. Төрүт культура учуутала Рожин М.В. «Саха быһаҕа» диэн 6 кылааска сингапурскай ньыманы туһанан төрүт култуура уруогун ыытта. «Хоһоонноохтук ааҕыы саҥарыы ньымалара» диэн кылаас таһынан дьарыгы көрдөрдүлэр. Уруоктар бары үрдүк таһымҥа аастылар.
Сэминээр иккис аҥарыгар Мясоедова А.В. «Олуктар» (синтаксическай параллелизмы поэтическай ньыма быһыытынан олоҥхо киириитигэр ырытыы) диэн маастар кылаас ыытта, үлэтин уопутун кэпсээтэ. Кэлбит ыалдьыттарга «Айар үлэ саҕыллыыта» хомуурунньугун презентациялаата, «Умнуллубат түгэннэр» диэн сценарийдарын кинигэтин бэлэхтээтэ.
Сэминээргэ кыттыбыт учууталлар санаа атастаһан, саҥаны-сонуну көрөн, инники үлэни торумнаан үөрэн-көтөн тарҕастылар.